ಮಾಂಗಲ್ಯಂ ತಂತು ನಾನೇನಾ ಮುಗಿದು
ನಿನ್ನ ಕರ ಪಿಡಿದು ನಾ ನಡೆದೆ
ನವ ಜೀವನದ ಸಪ್ತಪದಿಯನಿಡಲು!!
ನಾವಿಡುವ ಮೊದಲ ಹೆಜ್ಜೆ
ಈ ಜೀವನ ಸತ್ವದ ಪೋಷಣೆಗಾಗಿ
ಕೂಡುತ ಸಾಗೋಣ ಬಾ ಚೆಲುವೇ, ಮುಂಬರುವ ದಿನಗಳಲಿ!!
ಮುಂದೆ ಓದಿ
ನಮ್ಮಯ ಹುರುಪು, ಚೈತನ್ಯ, ಶಕ್ತಿ, ತೇಜಸ್ಸು
ಅಡಗಿದೆ ನಾವಿಡುವ ಎರಡನೆಯ ಹೆಜ್ಜೆಯಲಿ
ಎಲ್ಲರ ಆಶೀರ್ವಾದ ಹಾರೈಕೆಗಳು ನಮಗಿರಲಿ!!
ಮೂರನೆಯ ಹೆಜ್ಜೆಗೆ ಜೊತೆ ನೀಡು, ಮನದರಸಿ
ಧನಕನಕ, ವೈಭೋಗ, ಅಭಿವೃದ್ಧಿಗಾಗಿ,
ಆ ಭಗವಂತನ ದಯೆಯಿರಲಿ !!
ಸಂಸಾರ ಸೌಖ್ಯವರ್ಧನೆಗೆ
ಅನುಸರಿಸಿ ನನ್ನನು ಬಾ ನಲ್ಲೆ
ನಾಲ್ಕನೆಯ ಹೆಜ್ಜೆಯನಿಟ್ಟು ಜೊತೆಯಾಗಿ ಸಾಗೋಣ!!
ವಂಶಾಭಿವೃದ್ದಿಗೆ, ಮನೆತನವ ಬೆಳೆಸಲು
ಐದನೆಯ ಹೆಜ್ಜೆಯ ಜೊತೆಗಿಡು ಮನದನ್ನೆ
ಸಂತಾನ ಲಕುಮಿಯ ಕರುಣೆ ನಮ್ಮ ಮೇಲಿರಲಿ!!
ಆರನೆಯ ಹೆಜ್ಜೆಯಲಿ ಋತುಗುಣಗಳಿಗೆ ತಕ್ಕಂತೆ
ಸಮಯಾನುಕೂಲಿಗಳಾಗಿ ಜೀವನವ ಅನುಸರಿಸುತ
ನಡೆಯುವಾ ಎನ್ನುಸಿರೇ, ಹಲ ಜನುಮಗಳಲೀ!!
ಏಳನೆಯ ಹೆಜ್ಜೆಯಿಟ್ಟು ಸಖಿಯಾಗು,
ನಲ್ಮೆಯಿಂದೊಡಗೂಡು, ಜೀವ ಸಂಗಾತಿಯಾಗು
ಒಂದಾಗಿ ಸಾಗೋಣ ಬಾ, ಈ ಜೀವನ ಯಾತ್ರೆಯಲೀ!!