Sahityanjali.org - ಸಾಹಿತ್ಯಾಂಜಲಿ.org

ಬದುಕಿಗಾರ್ ನಾಯಕರು, ಏಕನೋ ಅನೇಕರೋ? |
ವಿಧಿಯ ಪೌರುಷವೋ ಧರುಮವೊ ಅಂಧಬಲವೋ?||
ಕುದುರುವುದೆಂತು ಈಯವ್ಯವಸ್ಥೆಯ ಪಾಡು? |
ಅದಿಗುದಿಯೆ ಗತಿಯೇನೊ? - ಮಂಕುತಿಮ್ಮ ||

ಮನುಷ್ಯನ ಬದುಕು ಮನುಷ್ಯನ ಹಿಡಿತದಲ್ಲೇ ಇದೆಯೆ? ಅಥವಾ ಅದನ್ನು ಬೇರೊಬ್ಬರು ಆಳುತ್ತಿರುವರೇ? ಮನುಷ್ಯನಿಗೆ ಇದೂ ಒಂದು ಬಿಡಿಸಲಾಗದ ಒಗಟಾಗಿಯೇ ಉಳಿದಿದೆ. ಅವನ ಬದುಕನ್ನು ನಡೆಸುವವರು ಯಾರು ಎಂದು ನಿಖರವಾಗಿ ತಿಳಿದರೆ ಬಹುಶಃ ಅವರನ್ನು ಒಲಿಸಲು ಅವನು ನಿಖರವಾದ ಮಾರ್ಗಗಳನ್ನು ಹುಡುಕಿಕೊಳ್ಳಲೂ ಬಹುದು.

ಒಗಟೆಯೇನೀ ಸೃಷ್ಟಿ? ಬಾಳಿನರ್ಥವದೇನು?
ಬಗೆದು ಬಿಡಿಸುವರಾರು ಸೋಜಿಗವನಿದನು? ||
ಜಗವ ನಿರವಿಸಿದ ಕೈಯೊಂದಾದೊಡೇಕಿಂತು |
ಬಗೆಬಗೆಯ ಜೀವಗತಿ? - ಮಂಕುತಿಮ್ಮ ||

ಈ ಸೃಷ್ಟಿ ಎಂಬುದು ಒಂದು ಒಗಟೆ? ಈ ಬಳಿಗೆ ಅರ್ಥವೊಂದಿದೆಯೆ? ಈ ವಿಸ್ಮಯವನ್ನು ಅರಿತು, ಅದನ್ನು ತಿಳಿಸುವರಾರು? (ಮನುಷ್ಯನಲ್ಲಿ ಈ ಎಲ್ಲಾ ಬಗೆಯ ಗೊಂದಲಗಳು ಇರುವುದರಿಂದಲೇ, ಇದರ ಬಗ್ಗೆ ಚಿಂತನೆ ಮಾಡುವವರನ್ನು ಆಶ್ರಯಿಸುತ್ತಾನೆ.

ದೇವರೆಂಬುದದೇನು ಕಗ್ಗತ್ತಲೆಯ ಗವಿಯೆ?
ನಾವರಿಯಲಾರದೆಲ್ಲದರೊಟ್ಟು ಹೆಸರೆ? ||
ಕಾವನೋರ್ವನಿರಲ್ಕೆ ಜಗದ ಕಥೆಯೇಕಿಂತು?
ಸಾವು ಹುಟ್ಟುಗಳೇನು? - ಮಂಕುತಿಮ್ಮ

ಕಗ್ಗ ದರ್ಶನ - ಡಿ.ವಿ.ಜಿ.ಯವರ ಮಂಕುತಿಮ್ಮನ ಕಗ್ಗದ ವಿಶ್ಲೇಷಣೆಯ ಸರಣಿಯನ್ನು ಪ್ರಾರಂಭಿಸಿರುವ ಪ್ರವೀಣ್ ಶಿವಶಂಕರ ಪ್ರವೀಣ್ ಅಮೆರಿಕಾದ ಕ್ಯಾನ್ಸಾಸ್‍ನಲ್ಲಿ ವಾಸವಾಗಿದ್ದು, ಈಗಷ್ಟೇ ಉನ್ನತ ಶಿಕ್ಶಣ (MS) ಮುಗಿಸಿ, ಸಾಫ್ಟ್‍ವೇರ್ ಇಂಜಿನಿಯರ್‍ ವೃತ್ತಿಯಲ್ಲಿದ್ದಾರೆ - ಸಂ